قطايف من غير مكسرات

بعد متابعتي لمسلسل "تحت الوصاية" للمبدعة "مني زكي" أتمنى إن بعض القوانين الخاصة بحضانة الأطفال تحديدا تتغير ، قانون الأحوال الشخصية للآسف محتاج إعادة نظر ضرورى جدا جدا جدا خصوصا فى مسألة إنصاف الستات اللي بتشيل وتتحمل كل حاجة.

وهقولكم إيه بس معلش يا ستات :الحب زي الحرب عايز رجاله

مسلسل "سره الباتع" أعاد إسم المخرج خالد يوسف من جديد على محركات البحث فى مكانه الصحيح والحقيقى : كفنان : فهو المخرج الموهوب ، وكرجل مصرى : فهو إنسان وطنى حتى النخاع ، وثالثا كمثقف : تشغله مسألة الهوية .

عودا حميد …وحمدلله على سلامتك يا خالد ..

سمعنا من قلب المدنية.. إن مدير إدارة برامج في قناة برامجها كلها تحس كده إنها " محورية" عايز يرجع لقناته القديمة اللي كان عامل فيها " صدى" مش بطال ، وخصوصا لما سمع إنه في حركة تغيرات وشوية فلوس حلوة طلعت.. مين مين مين!!؟ مش هقولكم … إعرفوا إنتوا لوحدكم!.

وسمعنا في المدنية برده …إن فيه ٣ تغيرات في مجلس إدارة واحدة من القنوات البيج أوووووى في الإعلام الحديث اللي لسه طالعة بقالها كام شهر.. يلا أهو كله "بلوشي" أو "بلشي" أو يمكن "قلشي".

وقالوا كمان من جوه المدنية… إن رئيس قناة وليدة فخيمة فهيمة رتيبة … قدم طلب بزيادة المقابل المادي للضيوف عشان عايز يجيب نجوم كبار وكده ، والغريب إن الطلب ده إتقدم من أول إفتتاح القناة والأغرب إنه إترفض وإتقاله : مشي حالك باللي عندك، عندنا عيال وعاوزين نربيها!.

مسلسل "جعفر العمدة" برغم إمكانيات معظم فريق العمل و طبعا الفنان محمد رمضان بموهبته وجماهيريته الكبيرة سواء على أرض الواقع أو بين مجتمع السوشيال ميديا فى العالم الأفتراضى ، لكن فكرة الإستمرا فى تكرار النوع ده من الأدوار وإظهار صورة الرجل العصري بشكل الحاج متولي والجو ده ، بجد بقى أسخف من برامج المقالب اللي بالك بالك .. هو إنتوا عندكم فكرة إن نسبة تعدد الزوجات فى مصر لا تتعدى 4% أصلا, فى حين إن نسبة المرأة المعيلة مثلا إقتربت من 20% …. ما نشغل دماغنا شوية بقى يا جماعة ، وكفاينا إفلاس فى الأفكار!.

قالك … مذيعة سابقة بقناة رياضية فئوية بقالها ٣ سنين بتاخد وعود إنها ترجع لقناة رياضية من نفس العيلة وكل شهر يقولوها اللي بعده اللي بعده اللي بعده…والحمد لله أهى رجعت فى اللى بعده ، وكله زى بعضه!.

تزامنا مع إحتفالية 125 عام على تأسيسه…البنك الأهلي المصري راعي لكأس السوبر المصري لكرة القدم بين القطبين الزمالك بطل الدوري والأهلي بطل الكأس ، والمباراة ستقام بإذن الله على أرض الإمارات العربية الشقيقة.. بجد شابوة للديل الهايل ده ، وللمهندس سيف الوزيري طبعا.

النجمة الإسبانية صاحبة الأصول التونسية هبه عبوك زوجة نجم الكرة المغربي أشرف حكيمي لاعب باريس سان جيرمان خسرت قضية كفالة أولادها ضد زوجها اللي تم إتهامه في قضية إغتصاب فتاة بعد أن أثبت القاضي إن حكيمي قام بكتابة كل ثروته بإسم والدته…. قلبي معاكي أحبيبتى أهبه وأوعى تسيبي حقك المحاكم الفرنسية مابتهزرش .

نفسي حد يوصلني بالعقلية اللي كتبت إعلان مدينة مصر عشان أحكم عليه يتفرج على كل حلقات المذيعة إيها اللى عايشة دور نصيره الرجالة … يعنى إنت أخدت كل الفلوس ديه عشان تغير حرف واحد ! فعلا طلعت سهلة ومش مستهلة !!.

الفراعنة من وجهة نظر نتفليكس تقريبا كده يا جماعة …كانوا منتخب الكونغو!! وحتى كليوباترا أيقونة الجمال مطلعين بشرتها سمرا !!! كليوباترا حفيدة الإسكندر الأكبر آخد لى بالك إنت اللي من اليونان فاهم حاجة، وأمها من سوريا، يعني شاميه والإثنين أبيض من الفل وفل الفل كمان هاتطلع سمرا لمين ؟! وبالنسبة لك عزيزى المشاهد :فبلاش إندهاش لأن لسه التقيل مجاش….أجندة !